أنا وأنت
بقلم: أمل أمين الخولي
وأنا معاك..
بحس بروحي مرتاحة
واتخطى كمان الصعب براحة
ولو بالكلمة تراضيني
أكون ترياق لأوجاعك
وبرضه مراية لعيوبك
بكل وضوح وصراحة
لكني بحس بالغربة
مانيش لاقياك
ساعات بتتوه في ملكوتك
وأكون وحدي وأنا وياك
وعارفه بأنه تفكيرك
في عمر وضاع بتكشيرة
وأحلام شاردة مع حيرة
لكن عادي وهتعدي
هنضحك واحنا جوانا من الأحزان
تلال وهموم على قلوبنا
ونزعل
وممكن برضه نتخاصم
وهنهاتي وهنهرتل
بألفاظ كلها طلاسم
ونرجع تاني نتصالح
ولا تهون روحنا على روحنا
ونتلاقى
بنفس ظروفنا في مكانّا
مع ماضينا وحاضرنا
وأيامنا
وأفراحنا وأحزانّا
وأحلامنا
أَنا وأَنت بنشكي لبعض
وأَنا وأَنت بنجرح بعض
وأَنا وأَنت دوانا لبعض
وأَنا وأَنت، يا كل اصحابي وحبايبي
كتير جدا أوي جدا بنشبه بعض
لقراءة المزيد من المقالات مجلة ريمونارف
لمتابعة كل ما هو جديد من هنا
