لما بعدت
ما سألتش
ولا حتى في يوم حنيت
في بعدي عنك
ما فرقتش
بس بتقول أنا حبيت!
والحيرة فـ بعدك تسكنني
الحيرة في بعدك سجن وبيت
بتوحشني
وفـ أحلامي توعدني
أقوم من الحلم استفسر
ليه الشمس في غيابك بتتأخر؟
يطول الليل
وأحزاني على الواحدة
بتتمختر
كأن الشمس مرهونة على بابك
وأفراحي في غيابك بتتبخر
كل يوم أغزل لُقانا في بر
والحلم جوايا راكب موجة
في وسط البحر
قال جالي يوم الفجر
قال افردي جناحك
ذنبي فيكي الهجر
والقلب سجانك
الشمس شاربة المر
ومخاصمة بَحارك
أنا وعدي كان حُر
مررني في غيابك
الضد كان الكل
وعيونك أماني وبر
الوعد كان مكتوب
موشوم عليه القهر
جوايا خنقة صوت
جوايا قايمة الحرب
كل يوم فيكي بموت
كل يوم يجلدني الصبر
يا أم العيون جارحة
وضحكها إدمان
جوا الكلام موال
مين يفهمه غيرك
صحيت والفرح مطوحني
لقيت الحلم جارحني
وكل حلم يقلب معاه لكابوس
