انطوائية
بقلم: سمر السعيد
ولا عمري كنت انطوائية
ولا حتى صفتي الهجومية
مِن شافني قال اجتماعية
ماحلاها حياة الصحوبية
ولا يمكن أسمع قيل وقال
المبدأ كان ده شغل عيال
ولا كان الشاغل مين قال!
العيب في السامع للموال
ومشيت الدنيا شرق وغرب
ولا يمكن أنسى رفيق الدرب
فرحي كان وفي وقت الكرب
ماحلاها حياة الصحوبية
وحقيقي حياة غالية عليا
وزي ما قالوا في الأمثال
عمر الدنيا ما تدوم على حال
وأهه جه الوقت عليا اختار
أنا أصلي بقيت ربة أسرة
لو كنت في يوم قادرة أطنش
أو أي حوار عارفة أفنش
الطفل ده لازم يتربى
ولازم له بيت يكون مأوى
وكلام وحوار ونجاح شكوى
وخصوصية لازم فيها يعيش
واللي هيوجع يا ريت ما يجيش
أصل الإنسان اللي يعافر
يمكن يوصل
أصله مغامر
يمكن ينجح
ليه هنكابر؟
تلاقي اللي يحطم فكره
ويحس ان الغم ملاذه
ويمكن حتما يوجع طفله
ويزيد ويقول ينشر عيبه
وإن كنت في يوم قادرة أطنش
أو أي حوار قادرة أفنش
جه طفلي خلاص قاللي ستوب
كان لازم ليكي حق الرد
ليه ممكن حد يوجعني
في وجودك قادر يجرحني
وأهه جه الوقت عليا اختار
أنا أصلي بقيت ربة أسرة
كان لازم اكون انطوائية
مع عالم غل وأنانية
كان لازم أبقى هجومية
للي هيأذي نني عنيا
كان لازم ليهم ناس أختار
من غير ما أقلق أو أحتار
وخصوصية لازم فيها يعيش
واللي هيوجع يا ريت ما يجيش..
لقراءة المزيد من المقالات مجلة ريمونارف
لمتابعة كل ما هو جديد من هنا
