سيدي يا سيدي
جاي بيدور وينادي
– فينك يا حبيبتي أحكيلك
مين بس يحس بآهاتي
يا أمي في الدنيا غيرك
من الدنيا دموعي بداري
الدمع بينزل في حضورك
وافضل أشكيلك أوجاعي
القلب اطمن بس يشوفك
سمعت كلام كتير منهم
مختلف!
جايز غريب عنهم
جرحوني ووجعني كلامهم
كان نفسي حقيقي أفهمهم
أو حتى أكون واحد منهم
مش عايز أبعد أو اسيبهم
خايف الوحدة رغم كلامهم
ساعديني يا ماما، أرضيهم..
أو حتى أكون نسخة شبههم
= بس يا سيدي، كده خلصت
لكل كلامك بقلبي سمعت
عارف يا حبيبي، لاجل غلاوتك
ولأن القلب عرف قيمتك
كان لازم ابيع كل الدنيا
لاجل عيونك، يا نبض القلب
راح تتعلم ترسم ضحكة
بتأكد إنك ورد وفل
مش راح ادورلك على كدبة
ولا راح اقولك أحسن م الكل
وان كنت في عيني أحسنهم
بسمِّي واقول ولا زيك زي
أيوه يا سيدي، كده أضحك
وتعالى أقول كلمة في سرك
الدنيا يا سيدي دي غريبة
ليها قواعدها تحس مريبة
ولا سايبة الواحد في طفولته
ولا حتى عايش شيخوخته
فرضت قواعدها وشروطها
والكل يخضع لأوامرها
لازم تبقى أكيد الأجمل
لا وكمان في الفصل الأشطر
وفي الرياضة شرط تبقى الأول
لازم يبقى أصحابك أكتر
وبطيب روحك تبقى الأفضل
تكبر حبة وتبقى عريس
لازم تلقى حبيب وونيس
يكون كامل طبقا لشروطها
وتنجح طبعا في دور الأب
إوعاك تنسى دور الحب
لا ونجاحك طول الدرب
والكل يشكر في أخلاقك
ويحكوا عن خطواتك ونجاحك
هوب بسرعة يكبر أولادك
لازم طبعا نفس النسخة
أحسن يحكي الناس
ويقولوا ده غباءك
أهي دي يا صاحبي قواعد الدنيا
رد بسرعة قابل قواعدها وشروطها
طيب راح أقولك كلمة كمان
يمكن تفهم كل تفاصيلها
إن كنت حقيقي كل كمال
راح يحكوا إنك كل عيوبها
ومهما دافعت كذب وخيال
هتلاقي من صدق ونشرها
فيا ابني، يا صاحب أيامي
يا نور عيني، وسر جمالي
بس أشوفك مرتاح البال
أتهنى بيومي وأحلامي
ومفيش في الدنيا كمال
عايزاك تبقى مراية لعيوبي
وهكون طبعا أنا كمان
مرايتك لعيوبك يا عيوني
يا حبيبي، بالصبر راح اساعدك
وبإذن الله هفضل جنبك
سندك، ضهرك دايما ضلك
راح أكون شمس تنور حلمك
إوعاك تخضع لأوامر الدنيا
ارفض قواعدها وشروطها
خلي رسالتك هي الأقوى
– مش راح أسمع أي تنمر
ولا هستسلم ولا هتكبر
هرفع راسي وهفرد ضهري
هقبل حالي، ثقتي في ربي
وهسعى لتصليح كل عيوبي
هقوي عزيمتي وإرادتي
ولا يمكن أبدا راح اصاحب
إلا حامل حبي واحترامي
وراح أعود نفسي أسمع
كل محب مقدر قيمتي..
