امشِي.. امشِي
عايزة تمشي؟!
امشِي
امشِي، ولا تبصيش وراكي، ولا ترحميش القلب اللي واخداه معاكي، ما هو اللي باعني وباع دنيتي علشان هواكي، هو اللي هرب من سمايا، واتعلق بنجمة بسماكي.
امشِي..
امشِي ومش هلوم يوم عليكي، انتي أصلا ما وعدتيش غير بعنيكي، أنا ياما قولتلك، لمحتلك، ووضحتلك إن عمري عايشه بين ايديكي.
وياما قولتيلي، ما تتعشمش، وما تحلمش، عشان ما تتجرحش، عشان ما تتألمش.
كنت حاسس إن حلمي بيكي عمال يقرب، واتوهمت اني لمست بإيدي نجمك، لكن طيفك هو اللي كان معايا، وشوقك مني كان بيهرب.
كل همك ترسميلي بأمان طريق رجوع لما تمشي، وافوق من وهم قلبي اللي ظلمك.
أيوه ظلمك، عشان لما حبك كان قيود في معصمك
كان بيخنقك، بيسجنك
وانا اللي ما قدرتش مرة أفهمك
امشِي..
وانا بعتذر عن كل لحظة ألم سببتهالك وضيق.
امشِي..
وانا بشكرك عن كل طاقة أمل نورتيلي بيها الطريق.
امشِي..
وانا بوعدك؛ حبك هيفضل معايا طول سكتي هو الرفيق.
لقراءة المزيد من المقالات مجلة ريمونارف
لمتابعة كل ما هو جديد من هنا
