الصورة صورتك
بقلم: نجلاء القاضي
الصُّورة صُورتك، والميدان مفتوح
والطير يغني، بس مش مسموح
يفرد جناحه أو بسره يبوح
الصُّورة صُورتك، والميدان فاضي
وانا قلبي عاش، ثاير على الفاضي
يهتف باسمك، بس مش راضي
يرفع همومه فوق كتاف الناس
الصُّورة صُورتك، والميزان مايل
والعدل شايل عمره فوق كفّه
والظلم عمره ما يبقى يوم مكتوب
وان كان ميزانك ماشي بالمقلوب
غصبٍ عليه ينعدل، لما القلوب يصفوا
الصُّورة صُورتك، والشورة للغربان
وازاي أعيش في النبع، عود عطشان؟
قلبك ده ليه أصبح حجر صوان؟
شايفني نايم فوق رصيف عمرك؟
هامش ومتجمعة فيه الهموم ألوان
الصُّورة صُورتك، بس بهتانة
وعنيك هي بس دبلانة
الصورة صورتك، خفت أنا منها
طب ليه تخافي لما شفتيها؟
طب ليه تخافي، ولا خجلانة؟
الصُّورة صُورتك، والبكا مكتوم
ملموم عليك البوم
الصُّورة صُورتك، بس مش هي
إمتى هتتصوري صورة تكون حية؟
الصورة صُورتك والميدان مفتوح
لقراءة المزيد من المقالات مجلة ريمونارف
لمتابعة كل ما هو جديد من هنا
