مش فاهم
بقلم: سلوى صبح
أنا اتعودت أكون نفسي، ما اكونشي حد ما بحبوش
ولا بقلد، ولا بجامل، ولا البس توب غير توبي
لا هو يكون لايق ليَّا، ولا أليقلوش
صحيح عايشين وسط عالم غريب جدا، وكله وحوش
لكني بكل بساطة، سمك بلطي بيتحارب في وسط قروش!
راضي وعايش، ومش عايش بكام ملطوش، يكفوا ساعات ومايكفوش
وبتخبط، طالع نازل
حزين بضحك، وضحكي عياط
وحتى كلامي مع نفسي كله طلاسم ما بفهمهوش
ودنيتي ماشية بالمقلوب
لا انا غالب، ولا مغلوب
ومعلشي، لو كان كلامي اللي أنا كاتبه، ومش فاهمه، مجرد رتوش، بذوق بيه صعوبة الحال، مع إني بغلوش حتى بكلامي
طب حد فاهم المعنى، ولا ما فهمتوش؟!
خليه جوه بطن الشاعر، حتى لو كان بيغامر، عامل شاطر على نفسه، وهو في الأصل يا دوب حرفوش!
