قسمتي ونصيبي
ساعات بشكر كتير حظي
وابوس فرحان كمان إيدي
بقسمة عدلها فيها
وحالي منها ونصيبي
واطيب خاطري من نفسي
وبحضنني
واغيب ماسك كدا في بعضي
واواسيني
من الأيام وقسوتها
وأحكامها وأفعالها
في تغفيلي وتضليلي
وبحسدني
واردد جملتي فيها
أنا الأفضل من كتير غيري
واصبرني على وجعي
واقول ومهما تغلبني
أنا راضي
ماهيش كلمة على الفاضي
والِم دموع مطر عيني
على خدودي
فتغسل وشي من وشي
وتفصل مني مسكاني
فتفضحني
تضحكني
وانا غرقان على روحي
مع ظنوني
تخبيني ملامح لسه مخطوفة ومنحوتة
في عمر العمر
اللي ضاع مني
من الخضة
مع الحسرة
على بكرة
فتجمعني
على حروفي
أطبطب بيها فوق صدري
وأنفخ فيها من روحي
فتتعفرت
وتتكهرب تواريخي
وكام مرة تلاقيني
بتلعنها تراتيلي
والوم ظلمها ليا
واقول اشمعنى سيباهم
وجايه كتير بأحمالها
وأحزانها
ورمياهم على كتافي
واخاف من فكرة العاصي
يكون بالقسمة مش راضي
يبات غضبان
فتتقفل بيبان الجنة من رفضه
ويطلع منها في الآخرة
كمان عريان
يا أول حد هيفسر
كلامي عكس أحلامي
بدون ما يشوف
شقوق الصمت
فـ حيطاني
كانت ضمة ضلوع الرعب
في الوحدة
وقتلاني
معاني توصفك فيها
فيتمرد دبيب همسك في أناتي
كأنك وانت بتعيط
خايف تسمع
أزيز البوح في وجداني
بتتشعبط على ذاتك
عشان تقدر تبيع في
الضلمة أحلامك
طوفانك موجه مش قادر
يعدي بحر أحزانك
ولا يحتل أحضانك
ولا يغرق مشاعري فيك
ويأسرني
ورغم إن الخطر باقي على شراعي
بدون مركب ما تجمعنا
لكن في عنيكي هتوضى
واعدي بصدق إحساسي
خريطة قلبي مسروقة
وانا التايه مع ظنونك
ومتحاصر بأوهامك
ومش قادر أحرر نفسي في حدودك
أنا هعبر على جروحي
واسجل اسمي فوق اسمك
ولو كان الثمن روحي..
قسمتي ونصيبي
لقراءة المزيد من المقالات مجلة ريمونارف
لمتابعة كل ما هو جديد من هنا
