عيني في عينك

عيني في عينك

بقلم: ناجح شرقاوي

تتحديني؟
طب عيني في عينك كدا وريني؟
خليها تقول مش بتحبيني
اكدبي انتي عينك ما بتكدبش
لما بتيجي النظرة في عيني ما بتهربش
ألاقي حنينها بحضن الشوق مستنيني
طب عينِي في عِينك كدا وريني؟
خليها تقول مش بتحبيني
بس بشرط ما نغمضش
عمري ما هنسى يوم ما قلتي
إياك تبعد
إياك تخلف بعد ما توعد
إوعى تصدق إني راح اهرب
إني راح اعند
بعد طريق كان صعب مشيته
جاية عليك علشان أسند
وتتحديني!
طب عينِي في عيِنك كدا وريني؟
خليها تقول مش بتحبيني
ولما في يوم قلت مفارق
حرقت قلبي دمعة بتهرب
كنت بودع وانا بتوجع
من نظرة بتسأل وبستغرب
هُنت عليك ازاي وهتبعد؟!
بعد ما قلبي لقلبك قرب
دارت بيا الدنيا ساعتها
من دمعة يأس راح تتسرب
وتتحديني!
طب عينِي في عيِنك كدا وريني؟
خليها تقول مش بتحبيني
من بين الناس لمعة عينك بتكون ليا
لما بقابلك بلقى سعادتك مالية الدنيا
بشوفها بعيني، بقلبي، بكل ما فيا
والقى عنيكي بترمي الشوق في حضن عنيا
زي الطفلة في يوم العيد
طايرة بعيد بيكي وبيا
وتتحديني!
طب عينِي في عيِنك كدا وريني؟
خليها تقول مش بتحبيني
أنا يا حبيبتي
عمري ما هبعد
عمري ما ههرب
عمري ما اسيبك
وزي ما وعدتك حتى في آخر الدنيا هجيبك
مهما هيحصل قلبك ليا
وقلبي حبيبك
وأنا هتحدى كل ظروفك
وابقى نصيبك
واتحديني
وعيني في عينك بقى وريني
وخليها تقول مش بتحبيني

لقراءة المزيد من المقالات مجلة ريمونارف

لمتابعة كل ما هو جديد من هنا