شيء ما بِينّا انجرح
فاكرة زمان كنا واحد، ضحكتي قبلي تٌخصِّك
دمعتي بتسكن في عينك، واسمع آهاتي في قلب همسك
صعب تِفرِقنا العيون، وعٌمري على قلبك ما أهون
اتعاهدنا مهما شوفنا أو سِمعنا، وإن عاتبنا، وجه زمانّا في يوم وعانِدنا، عمر ما أيادي الفُراق تلمس قلوبنا، أو عزول لحظة ينول، ويقول بِعدنا
شيء ما بِينّا انجرح
احنا أكبر، أكيد هنقدر، ودايمًا أشطر
ومرت سنين زي طيف عدى علينا
واتسرسبت أحلامنا تجري ما بين إيدينا
مش مهم يموت لي حلم، ما انتِ عارفه براح خيالي لو مات لي حلم، عمري ما ابكي
سلسلة أحلامي باقية؛ ما دُمت عايشة
وانتِ شرحه؛ نفس قلبي، وهو فِكري، ما بيكِ حاسة
شايفة وعارفة، إيه جرى لنا؟
ليه كلامنا صبح تِقيل أوقات عِتابنا؟!
شيء ما بِينّا انجرح
حتى صراحتي، اللي دايمًا تعشقيها، النهارده لقيتها، من أسباب عذابنا
بعد ما لقيت الأمان في أحضان جنابك، بتبعديني ألف ميل، وتردي بابك
وكتبتي بالبونط العريض:
ممنوع عتابك!
واختفت ما بينّا خطوات الفرح، وبتخنقيني بألف طوق، لما سؤالي بينطرح
شعور غريب، وإحساس عجيب
هو إنه يا صديقتي، كان شيء ما بينّا
لكن خلاص، حسَّاه انجرح.
شيء ما بِينّا انجرح
لقراءة المزيد من المقالات مجلة ريمونارف
لمتابعة كل ما هو جديد من هنا
