لو فيه حاجة فاضلة معاك
من حبنا وناسيها في جيبك
وانت بتحسب عمر هواك
قلِّب كدة يمكن تلاقيها
هبعتلك في التوّ صورتها
يمكن جايز تعتر فيها
هي أكيد في ديوانك لسة
واخدة كثير منك ملامحها
بيت واتنين الصفحة قديمة
من غير فهرس ولا أرقام
أنا حافظاها كأنك لسة
كنت كاتبها من أيام
هي بداية وحي رسالتك
رحت ضاممني وقلت اعترفي
أنا في عيونك بحر وقافية
علشان خاطرك هفضل اغيَّر
في الأوزان
قبل ما توصل آخر السكة
صفي حسابنا وامضي مخالصة
لو فيه باقي لسة ف جيبك
هات بالباقي شوية شِعر
زي اللي انت كتبته زمان
شعر حقيقي مش تقليد
عايزاه غالي زي زمان
ادفع فيه ولآخر سعر
إوعي تقولي كنا وكنا
مش عاوزاك توصفلي
جروح
شاربة ما بينّا بحر دموع
عاوزاك تكتب حب في حب
افرِد كل كفوفي عليه
وانقش فيهم نقش الحنة
ارسم قلب وله جناحين
حب في نفسك حب ف غيري
اكتب حتي ف حب الرب
نفسي ألوِّن شَعري الشايب
وارجع تاني ادوب واتحبّ
الله الله بسم الله ماشاء الله