روح وقول له
بقلم: نشوة أحمد علي
اللي قالّك إنه جنبك
روح وقول له.. جنبي فين؟
انت كنت جنبي فعلا
بس غدرك كان دفين
عمري ما احتجت لمساعدة
وانت مدّيت بالإيدين
أردّ وابعدهم يوماتي
تحلف وبأعظم يمين
كتفي الشمال يبقى زادك
والمايه فـ كتفي اليمين
رفضت مرّة ومرة شكرتك
وانت صمّمت اني الين
عمري ما احتجت إلا نفسي
ورب الكون دايما يعين
بس تصميمك خدعني
فكّرتك شهم وأمين
عشمي زاد وصدقتك
واتمليت ثقة ويقين
قولت أجرّب..
فيها إيه!
فاختفيت..
رُحت فين؟
كنت حاجز صف أول
بين قوايم الخاينين
رد فعلك مش فاجئني
ولا كُونك كتلة ضنين
ياللا ضُم ع اللي قبلك
سيبني افرّح قلبي الحزين
خلاص نسيتك
انسى بابي
انت مقلب أو كمين
فاللي قالّك إنه جنبك
روح وقولّه.. انت مين؟
لقراءة المزيد من المقالات مجلة ريمونارف
لمتابعة كل ما هو جديد من هنا
