حبك تابوت
بقلم: وحيد علي الجمّال
حبك تابوت مابينتهيش
رافض يعيش بعدك سجين
ولا ألف موت ينفع دليل
إن الرحيل أول طريق
آخر طريق المجروحين
ماترخّصيش قلبك
في سوق العاشقين
و لا تِرخَصي
خلي اللي بينّا
على طبيعته بيستحي
ينقص يزيد أو يختفي
تشكي فصوله وتجرحي
عمر الندم ما هيتصدم
بدموع عينيكي يختشي
متخليهوش بينّا غريب
مليان دموع
على قد صدقه نرجسي
لا عمرنا كنا ملايكة
لبست في يوم توب البشر
لسة الذنوب اللي ما بينّا
سهل جدا تغتفر
فن السكوت لازم يفوت
يعمل سدود
وتعدي بيه بحر الغضب
ماتخلينيش أسبح بدمي
على الرصيف
واكسر شراعي ومركبي
ماتشرقيش بين الضلوع
وتغرّبي
مهما حاولتي هتخسري
على ألف مدنة تأذني
راح ترجعي تتندمي
مش حرب داخلينها سوا
مين فينا بس يكون سعيد
جوة انتصاره منتشي
والتاني ماسك في الهزيمة
بينكوي
عمالة تتصعب علينا
كل الفصول متوغوشة
مش عارفة تهرب م الشتا
روحي في حضني بترتجف
طبعك وطبعي مختلف
محتاج خاطرنا ينجبر
ويطير هناك فوق القمر
ما تبخليش تاخديني
في عيونك أسير
لو شوفتي قلبي
عن هواكي بينحرف
خايف يعشش بالملل
موت الحياة
دايما بيطلع في العلل
من غير تابوت
ضمي اللي نايم في الكفن
أنا حبي ساعة ما اتولد
كان أصله باين ابن موت
لقراءة المزيد من المقالات مجلة ريمونارف
لمتابعة كل ما هو جديد من هنا
