جرح وإيمان
بقلم: هدى إسماعيل
أنا الماضي اللي بكاني
وضيع كل أحلامي
أنا سنيني كانت طارحة
جناين حب على فرحة
أنا البهجة في كل طريق
أنا الضحكة لكل صديق
إيد ممدودة لكل غريق
وعمري ما بعت خِلاني
غدرني زماني ما رحمني
وحطمني
وكسرني
في عز الفرحة قطعني
وقلي كفاية
عشتي سنين
كفاية تسعدي الملايين
لازم تعيشي لون تاني
تشوفي القسوة والحيرة
تدوقي من الزمن مُره
كفاية ضحك وأغاني
وعيشي ذل حرماني
لأن الفرحة دي كتيرة
على قلبك
على ظلك
على يومك
على أَمسك
لازم أخليكي أسيرة
كسيرة
عايشة في الحيرة
في ضلمة تجري ولا شايفة
ولا عارفة طريق لرجوع
وعينيكي ماليها دموع
وضحكة فالقلب شرقانة
ما تطلع يوم
وروحك تبكي م الحسرة
على بكرة اللي مش راجع
وفجرك اللي مش طالع
كفاية بهجتك عدت
كفاية فرحتك صدت
كبيرك تمشي وتقولي
زماني كان
بدون عنوان
على وجه السما تهيمي
ماليكي جراح وسكاكين
ومين مني هيحميكي
يخليكي تلقي نفسك يوم؟
صرخت وقلت يا ربي
ترحمني
تكون جانبي
طبيب قلبي
تنجيني
وتحميني
يا رب أنا عارفة
أنا عارفة إني إنسان
ساعات أحس كتير غلطان
لكن عارف يا ربي
إنك رحيم رحمن
تنجيني من زمن ظالم
وسكاكينه اللي تؤذيني
تعوضني عن الماضي
اللي جرحني وضيعني
وتعفو عن أسى سنيني
ويرجع فجري من تاني
ينور بنور وجهك اللي يرعاني
واسعد برضاك
وتمسح كل أحزاني
وأعود من تاني
قلب سعيد فرحان
بعزك من شقا زماني
لقراءة المزيد من المقالات مجلة ريمونارف
لمتابعة كل ما هو جديد من هنا
بقلم: هدى إسماعيل
