تقدر ولا الحلم كبير؟!
بقلم: هدى إسماعيل
سألوا:
ماذا لو وجدت مصباح علاء الدين
راح نطلب منه إيه؟!
قلت راح اقول له:
عندي كام حلم أوانهم راح
عايزة الكون يتملي أفراح
عايزة الناس تعيش في براح
ولا تعرف أيامهم أحزان وجراح
عايزة الشمس الشموسة
تشرق سعد وتنشر خير
والأفراح تطرح أفراح
ما نعرف منها نروح على فين
كل خطوة تطرح زهرة
وتنور في نور القمرة
واللي فارقنا يرجع لينا
عايزة م حدش يكره بكرة
ولا يخاف من غدر زمانه
دايما كل الناس خلّانه
وفا ومحبة ما لها حدود
والأيام بالسعد تجود
بكل محبة وخير وأمان
ما حدش منّا يبات مجروح
ولا محروم
وكل اللي اتمناه يتحقق
مش هطلب منك أموال
بس سلامة من الأهوال
بس سعادة وراحة بال
هطلب إيد مدودة بحب
أيوه صحيح
كل سلامة من الأمراض
لأجل ما ننسى ألم الآه
لما مريض ما يلاقي دواه
أكتر حاجة بتوجع قلبي، هي الحاجة وما حد معاه
تقدر ترسم باللون الأخضر حلم لبكرة أوانه مزهر؟!
تقدر تمحي جراح امبارح؟!
تقدر تخلي قلوبنا تسامح؟!
تقدر تسعد قلب صغير
الأيام خلته فتافيت؟!
تمحي مرارة الغربة القاسية
وتنسيني غدر حبايبي؟!
عايزة الفرحة تكون مرسومة جوه عيون اللي انا حبيتهم
مش بهتانة
لأنها طالعة صحيح م القلب
عايزة نجوم السماء دي تلالي
صوت ضحكتها دايما عالي
تشع البهجة كأنها ماس
تطيب كل قلوب الناس
عايزة الأرض الجافة تخضر
عايزة الدنيا ما ينقص منها أبدا خير
تقدر ولا الحلم كبير؟!
لقراءة المزيد من المقالات مجلة ريمونارف
لمتابعة كل ما هو جديد من هنا
