اللى ما قلتوش
أنا ما فهمتوش
ولا عمري انا هقدر أستنتج
وأكمل معني ماحستهوش
مطلوب تتّكّي على كلامك
ماتحطيش تعبك ومرارك
وتعيدي الكلمة تلات مرات
علشان استوعب احساسك
وأغيّر مودي اللي تحول
من شكل ملامح تكشيرتك
من كلمة بتطلع بالعافية
من غير حسابات
وكأن صابحنا بيتكفى
مش قادر يوزن في الكفة
ويردد جملة تلات كلمات
أنا شايل دفتر للذكرى
متسجّل فيه حبة سلامات
ومعاهم كام إحساس بايت
ووعود تتعبى في شكاير
على إنك تفضل في حياتي
ولا أحلى ملاك
بترفرف جوة ف أحلامي
من غير جناحات
بتعافر يفضل كدا بينّا
حب الروايات
قبل ما يتبعتر في الزحمة
ويطلع خيالات
وصباح الخير عمرها ما تقول
إزاي الدمع في عيني كتوم
تضحك وجروحها تملي تزوم
في القلب غيوم وكلام مسموم
مع كسرة روح قررت الصوم
مش عارف افسّر أسبابه
ولا حتي أسجل ف بنوده
لكن مهموم وساعات مغموم
كان يتهيألي انك فاهم إيه المقصود
من غير ما افتحلك بقى روحي
من نظرة عين بتعدي تفوت
تبقى ف ملكوت ما يفسّرهاش
غير التعويذة المكتوبة
بينّا في قاموس
أنا ما اخترتش
أفضل في مدينتك مستني
آخر تأشيرة لإقامتي
وشهادة تقول ان انا مسجون
داخل قضبان ذاتي ونفسي
من غير تصريح يثبت حقي
مش لازم تسكن أوردتي
أو حتى تكون داخل نبضي
ولا عمر الناقص جوايا
يكمل من غير ما اثبت حقّي
إن وجودك داخل دمّي
هو دليلي وسر براءتي
ما بقاش فيه صعب ف أسئلتي
وفشلت في مجموع يسمح لي
أدخل في قصايدك وديوانك
أو حتى أمرّ ف أحلامك
لقراءة المزيد من المقالات مجلة ريمونارف
لمتابعة كل ما هو جديد من هنا
