أشواقنا
بقلم: أمل أمين الخولي
على ايدينا اتولد شوقنا
وعاش واتربى فـ عينينا
وكبرناه لجل تملِّي يجمعنا
لو الأحوال ساءت بينّا
وجِه زمانّا وقسي علينا
قولناله يكون دايمًا على ميعادنا
وفـ حضنه بكل القوة يسندنا
وإياه يرضى لو لحظة بكسرتنا
فـ علمناه يكون “إنسان”
وقت المحنة يحضنّا وما يبعدنا
وزاد الشوق جوا قلوبنا واتمكن
ينادينا بعزم ما فيه ويتمسكن
ومن أحلامنا بقا لينا دفا ومسكن
وخلى فراقنا يبقى مُحال
عمره لا يبقى ولا يمكن
بس احنا خلفنا الوعد
وده حالنا يا بني آدميين
آه والله بجد
لا لينا كلمة ولا بنحفظ لبعض الوِد
نسيب أشواقنا تقتلنا
ولو هنعيش بنـ.. ـدبح بعض
ونكابر ونتألم
وهنكشر وهنبلِّم
ونعدي ولا نسلِّم
ونخسر بعض ع الهايفة
وأشواقنا تبات خايفة
وتلعن يوم ما كان لها يوم
على ايدينا.
لقراءة المزيد من المقالات مجلة ريمونارف
لمتابعة كل ما هو جديد من هنا
